വിലവര്‍ധന; ഏപ്രിൽ ഏഴിന് കോൺഗ്രസ് കാളവണ്ടി പ്രതിഷേധം

പാചകവാതക വിലവർധനയ്‌ക്കെതിരെ കോൺഗ്രസ് ഏപ്രിൽ ഏഴിന് കെപിസിസിയുടെ നേതൃത്വത്തിൽ രാജ്ഭവൻ മാർച്ചും ധർണയും നടത്തും. രാജ്ഭവനിലേക്ക് സ്കൂട്ടര്‍ ഉരുട്ടിയും മുച്ചക്രവാഹനങ്ങള്‍ കെട്ടിവലിച്ചും കുതിരവണ്ടി, കാളവണ്ടി എന്നിവയില്‍ യാത്ര നടത്തിയും പ്രതിഷേധം സംഘടിപ്പിക്കും.

രാജ്ഭവൻ മാർച്ചിന് കെപിസിസി പ്രസിഡന്റും പ്രതിപക്ഷ നേതാവും നേതൃത്വം നൽകും. സെക്രട്ടറി ടി.യു.രാധാകൃഷ്ണൻ അറിയിച്ചു. ഇന്ധന, പാചകവാതക വിലക്കയറ്റത്തിനെതിരെ എഐസിസിയുടെ രണ്ടാംഘട്ട സമരത്തിന്റെ ഭാഗമായാണ് പ്രതിഷേധം.

വിലക്കയറ്റ മുക്ത ഇന്ത്യ എന്ന മുദ്രാവാക്യമുയർത്തി മൂന്ന് ഘട്ടങ്ങളിലായാണ് കോൺഗ്രസ് സമരം നടത്തുന്നത്. മാർച്ച് 31ന് സംസ്ഥാനവ്യാപകമായി വീടുകൾക്കും പൊതുസ്ഥലങ്ങൾക്കും ഗ്യാസ് സിലിണ്ടറുകൾക്കും ഇരുചക്രവാഹനങ്ങൾക്കും മുന്നിലും ഏപ്രിൽ നാലിന് ഡി.സി.സി.യുടെ നേതൃത്വത്തിൽ ജില്ലാ ആസ്ഥാനത്തും മാലചാർത്തി പ്രകടനം നടത്തിയിരുന്നു.